فيما يلي نص الحوار:
سؤال: ما الدور المزمع أن تقوم به مصر في التحالف الذي تتزعمه الولايات المتحدة في مواجهة تنظيم الدولة الاسلامية؟
خليني أأكد على إن احنا ملتزمين التزام كامل بالتعاون لمكافحة الإرهاب في المنطقة، مش بس على قد التعامل مع مسألة داعش لوحدها، لا، إحنا بنتكلم على دعم كامل من جانب مصر لاستراتيجية كاملة لمكافحة الإرهاب في المنطقة والعالم كمان.
مش عايزين نختزل المجابهة في فقط المواجهة العسكرية والأمنية، أنا متصور ان احنا لازم الاستراتيجية الشاملة اللي بنتكلم عنها يكون جزء منها المجابهة العسكرية والأمنية صحيح، لكن فيه كمان مكافحة الفقر، دعم الاقتصاد لدول المنطقة ده مهم، بنتكلم على تحسن مستوى التعليم ده مهم، الخطاب الديني الإسلامي ده محتاج إنه هو يبقى فيه تعديلات. ده لما يتعمل، المجموعة دي على بعض، حتحقق نتيجة حاسمة في مكافحة الإرهاب.
سؤال: هل ستكفي الغارات الجوية للدول الغربية بقيادة الولايات المتحدة لإنهاء خطر تنظيم الدولة الاسلامية؟
أكيد حتجيب نتيجة لكن متنساش إنه فيه كمان قوات عراقية موجودة في المنطقة ... العراق دولة مش بسيطة، القوات العراقية قادرة إنها تساهم في ده. المهم إن يكون فيه مناخ مناسب، يبقى داخل العراق علشان المواجهة دي تنجح بشكل جيد، الموضوع هنا مش ان يبقى فيه قوات برية من دول أخرى، إذا كان الأمر يتطلب كده أو لا، أنا بتكلم إن حجم القوات العراقية اللي موجودة بالدعم والجهد اللي هيتبذل من جانب الولايات المتحدة ودول أخرى هيبقى كفاية، أعتقد ذلك.
مهم جدا إن يبقي دايما فيه حوار ونقاش عشان الأمور تبقي ماشية في السياق الطبيعي للمكافحة اللي بنتكلم عليها. الإرهاب أمر بيمثل خطورة لدول المنطقة بدون استثناء. والتصدي والمجابهة يبقى من جانب الجميع وبيتم تنسيق.
سؤال: هل الحرب على تنظيم الدولة الإسلامية ستكون مفتوحة؟
هتاخد وقت، مافيش كلام إن مجابهة الإرهاب بتاخذ وقت لأنه مش عمل ضد قوات نظامية زي ما انتم شفتم كده القوات بتبقى موجودة في وسط مدنيين كمان أو عناصر موجودة وسط المدنيين فهي هتاخد وقت . لكن زي ما بأكد وبأكد ده مرة تانية احنا اتكلمنا عن المخاطر دي من فترة طويلة وحذرنا منها وقولنا إن تواجد مقاتلين من دول أخرى في المنطقة في منتهي الخطورة فيه عناصر موجودة حتى من دول أوروبية من جنسيات بريطانية وألمانية وفرنسية وغيرها ومن كل دول العالم، تجميعهم في بيئة زي كده ده من أخطر ما يمكن، وده لابد ان احنا نبقى ... وعلشان كده التحدي المطلوب إن احنا نمنع وصول المقاتلين إلى هذه المنطقة.
سؤال: ماذا أنتم فاعلون حيال الخطر على مصر مما يحدث في الجارة ليبيا؟ وهل هناك احتمال لتدخل عسكري مصري في ليبيا؟
أكدنا على مخاطر الموقف في ليبيا من فترة طويلة، وقولنا إن فيه مهمة لم تستكمل تجاه الموقف الليبي، بعد سقوط النظام السابق كان مطلوب أن يتم تجميع السلاح الموجود في ليبيا وإعادة بناء الأجهزة الأمنية والمساعدة في إقامة نظام ديمقراطي يرضى عنه كل الليبيين، وده محصلش.
احنا لينا حدود ممتدة مع ليببيا 1200 كم، وبيتم فيها تدفق أو تهريب واحنا بنبذل جهود من جانبنا احنا من جانب مصر علشان نمنع ده سواء كانت أسلحة أو كان مقاتلين ممكن يخشوا يدخلو مصر ويعملوا عمليات إرهابية زي ما حصل كده في الفرافرة ومات من عندنا مرتين في المنطقة المجاورة للحدود مع ليبيا. وعلشان كده الأمر محتاج تضافر كل الجهود علشان اللي احنا بنتكلم عليه ده.
احنا دول الجوار احنا والجزائر حريصين على أن الموقف في ليبيا يستقر، وده بيمثل، مش تهديد لا لينا ولا حتى للأوروبيين، ده محتاج جهد مشترك مننا كلنا لاستعادة الاستقرار في ليبيا. فيه برلمان، هذا البرلمان يعبر عن إرادة الشعب الليبي، احنا بندعمه ولازم كل المجتمع الدولي يدعم الشرعية القائمة في ليبيا الآن.
المخاطر مش بس، الإرهاب بيهددنا في سيناء كمان، واحنا بنبذل جهود من أكثر من سنة لاستعادة الموقف. إحنا حريصين إن جهودنا تبقى داخل حدودنا، وبالتعاون مع دول الجوار والمجتمع الدولي نحقق نجاحات أخرى داخل ليبيا، نجاح سياسي، في إن البرلمان الليبي وإرادة الشعب الليبي تحترم من خلال جهد مشترك لينا كلنا، ده اللي احنا بنسعى كلنا ليه دلوقتي.
سؤال: ماذا يعني الالتزام بدعم التحالف ضد تنظيم الدولة الإسلامية؟ هل هو السماح باستخدام المجال الجوي المصري أم المساندة اللوجيستية؟
احنا قولنا ان احنا ملتزمين التزام كامل بالدعم، ده بيخلينا بنقول إن أي أمر يتطلبه هذا الدعم هنعمله.
سؤال: هل هناك بوادر ظهور للدولة الإسلامية في سيناء؟
العناصر الموجودة في سيناء عناصر جهادية ذات فكر تكفيري، منهم أنصار بيت المقدس، على سبيل المثال. احنا بنجابه ده في سيناء بشكل جيد.
لكن عايز أقول ان داعش ده فكر زيه زي أي فكر متطرف مع اختلاف الأسماء اللي موجودة هنا وفي نيجيريا وفي مالي وفي أي دولة تانية. لكن ده فكر محتاج مكافحة واستراتيجية شاملة لمجابهته وده هياخد وقت.
سؤال: هل تعتقد أن العالم أساء فهمك؟
هما كانوا محتاجين يشوفوا إرادة الشعب المصري بشكل واضح، وده أمر هيساهم حقيقة في مكافحة الإرهاب.
احنا بنتكلم على دولة محورية في الشرق الأوسط، دولة فيها 90 مليون مصري. المصريين دول تفهموا كويس جدا هذا الفكر ما بقوش يدعموه مش معني كده انهم كانوا قبل كده بيدعموه هما كانوا متعاطفين مع فكرة الاسلام السياسي. وده اللي خلي هذا التيار يجد فرصة انه يحكم مصر، بمنتهى الوضوح كده واحنا بنتكلم بصراحة.
لكن بعد سنة من التجربة، المصريين فهموا إن هوية الدولة المصرية هتضيع منهم. والمصريين هما اللي اتحركوا بالملايين علشان يستعيدوا مصر اللي كانت، وبقول ده أمر في منتهى الأهمية، وده تغير خطير جدا واستراتيجي، لأن احنا بنتكلم على دولة فيها 90 مليون تفهموا ان مش هينفع ابدا الفكر ده يكون موجود في مصر. ده اللي، أنا عاذر العالم إنه مقدرش أنه، لأن ده أمر كان محتاج لمتابعة دقيقة، لأن مصر كان هيبقى شأنها زي شأن كل الدول اللي بتعاني دلوقتي من عنف واسع واقتتال داخلي كبير وحرب اهلية ممكن، دي دولة بقول فيها 90 مليون مش خمسة مليون ولا ستة مليون زي ليبيا لا دي دولة كبيرة قوي لما يحصل فيها كده يبقى المنطقة دي بالكامل، يبقى مشكلة كبيرة للعالم كله ومنطقة الشرق الأوسط لو مصر كانت سقطت في الحرب الأهلية.
احنا بنبذل جهود كبيرة، وبنحقق نجاحات، لكن عشان نقول إن احنا حققنا أهدافنا الحقيقية في القضاء على ظاهرة الإرهاب ، انا قلت ان العمل مش أمني بس ده عمل اقتصادي لابد ان يتطور بشكل جيد فيه مستوى تعليم لازم ياخد حقه علشان يبقى المنتج التعليمي والثقافي في مصر يتحسن بشكل معتبر، احنا حنحقق ده مع بعض. الخطاب الديني كمان نقدر ننجح فيه وده بياخد سنوات طويلة عقبال ما يجيب، يعني، تبان نتايجه. احنا نتكلم على حاجة على حاجة او استراتيجية على مدى زمني مش سنة و اتنين وتلاتة. مش عايزين نختزل المجابهة، والسؤال انا قلت انا بتصور إن في خلال سنة أو اتنين هنحقق نجاح حاسم، انت كده بتتكلم فقط على النجاحات الأمنية، لكن الظاهرة نفسها وأسبابها علشان نقضي عليها تماما بنتكلم في اقتصاد في جهل في تعليم في خطاب ديني.
سؤال: إلى أين تتجه المنطقة بعد أحداث هذا العام في سوريا والعراق واليمن وليبيا وغزة، وما هو تقديرك للخطر المحيط بالمنطقة؟
أنا هكون صريح، من أكثر من سنة حذرت إن المنطقة بتتجه إلى خطر عظيم من جانب الفكر المتطرف والإرهاب . وقتها ماكنش واضح قوي الكلام ده وماكنش بيهتم الاهتمام بيه بالشكل المناسب لحد ما حصلت الاحداث بتاعة العراق واجتياح داعش للحدود السورية العراقية وعملت الفظائع والجرائم اللي عملتها.
كنت بأكد على إن وجود مقاتلين أجانب من كل دول العالم ده في منتهي الخطورة، ليه، لأن هما ممكن يكون فيه فكر وتنظير نظري لأفكار متطرفة وتحويل ده إلى ممارسة عملية من الاقتتال، المقاتلين الأجانب دول مع بعضهم وجايين من كل دولة من دول العالم، الفكرة ابتدت تبقى مش مشتركة بس، لا، ده العمل ابتدى يبقى عمل مشترك. كل صاحب فكر متطرف في بلده تبقى أجهزة الأمن، داخل هذا البلد إلى حد ما بتحتوي الفكر ده وبتحول دون انه يوصل إلى درجة من الخطورة زي اللي احنا شايفينها. اللي حصل في السنتين اللي فاتوا إن دول، إن الفكر ده اتحول الى عمل ميداني على الأرض واتجمعت العناصر دي من كل دول العالم داخل المنطقة، وابتدوا يقاتلوا والفكرة بقى بيتم تنفيذها على الأرض فعلا. طيب ايه اللي هيحصل بغض النظر عن اللي حصل في العراق. كانت العناصر دية هترجع لبلادها كل بلادها في انجلترا وفي فرنسا وفي مصر كمان وفي أي دولة من الدول اللي خرجت منها، مواطنيها، وهتقعد تتكلم وتنظر لهذا الفكر في بلادها. يبقى هنجد في كل دولة من دول العالم، حتى اللي ماكنش عندها هذا الفكر بشكل كبير، بقى موجود، وبقي قابل للتنفيذ. يبقى احنا عملنا بؤر إرهابية في العالم كله، العالم مش هيتسريج وانا قلت لو بقى فيه مليون داعش يبقى دول هيعملوا مشكلة كبيرة جدا مش بس في العراق وسوريا ، لا، في المنطقة كلها، وحتى في اوروبا، بمنتهي الوضوح كده.
فده محتاج مننا ان احنا ننتبه لكل عمل زي ده ونجابهه المجابهة الحقيقية بتاعته.
سؤال: تحدثتم طويلا عن تجديد الخطاب الديني والتعاون مع مؤسسة الأزهر في هذا الغرض، فما هي الخطوات العملية التي تنوون اتخاذها بالنظر إلى أن من سبقكم في الرئاسة حاول تحقيق هذا دون جدوى؟
حصل تغير استراتيجي في وعي المصريين، وعي المصريين النهاردة منتبهين جدا جدا للفكر المتطرف اللي هو بعيد عن سماحة الإسلام ووسطيته. ده بقى خلاص بقى واضح للمصرين بشكل ضخم جدا ، وافتكر انه بقى واضح لكثير من المسلمين في كل دول العالم. ده التغير اللي احنا بنأسس عليه ان يبقى فيه فرصة حقيقية ان احنا تغير الخطاب الديني، انا عاوز أول ان بقى في استعداد للرأي العام إنه هو يتلقي ويستقبل التجديد اللي احنا بنقصده ان هو يرفض الارهاب والتطرف ويستدعى مرة تانية الوسطية والسماحة اللي موجودة في الدين الاسلامي.
مؤسسة الأزهر ووزارة الأوقاف في مصر بتبذل جهد كبير دلوقتي، لكن أنا بقول بمنتهى الوضوح مش هنتصور ان ده هيجيب نتيجة حاسمة دلوقتي الخطاب هياخد سنوات طويلة عقبال ما يجد أثاره في المجتمع عقبال ما تلاقى ممارسة فعلا تطمنك على أن فكرة التطرف وفكرة الإرهاب ابتدت تبقى بعيدة عن المجتمع ، هتاخد وقت ... لكن الجيد إن المصريين عايزين كده دلوقتي .
سؤال: تغادرون إلى الولايات المتحدة يوم غد الأحد لحضور جلسات الجمعية العامة للأمم المتحدة، فهل من المخطط لقاء الرئيس أوباما؟ وما تقديركم للعلاقات المصرية الأمريكية في الوقت الحالي؟
مهم جدا ان احنا نفتكر ان مصر ليها علاقة استراتيجية مستقرة مع الولايات المتحدة الأمريكية من أكثر من 30 سنة واحنا حريصين على هذه العلاقة. لكن الأمر ما، ساعات العلاقات دي بتشهد بعض التجاذبات، لكن لازات العلاقات المصرية - الأمريكية علاقة استراتيجية.
فيه تعبير دايما بكرره بيقول إن القدرة تعني المسؤولية، والولايات المتحدة لديها قدرة عظيمة في العالم والاوروبيين لديهم مسؤولية تجاه المنطقة، لازم كده، لأن الأحداث التي تمر بيها المنطقة تؤكد الكلام ده.
سؤال: يقول البعض إن الحملة الموجهة ضد الإخوان المسلمين قد ساهمت في انتشار التطرف الديني، فما رأيكم في هذه الانتقادات؟
خليني بمنتهى الوضوح كده أقول ان الإخوان المسلمين أخدوا فرصة الحكم في مصر، بدون أي شكل من أشكال العنف، والمجتمع المصري كان، لو نتابع اللي احنا قولناه في البيان بتاع 3 يوليو كان بيعطي الفرصة للعمل مرة أخرى والمشاركة مرة أخرى. لكن المشكلة ان هما .. كنت دايما بسأل السؤال لكل من بيسألني بقوله ياترى هما عايزين يشاركوا وإلا عايزين يجابهوا، لو عايزين يشاركوا المشاركة متاحة، لكن لو عايزين يجابهوا ده خطير على مصر. للأسف هما عايزين يجابهوا، ودي مشكلة، لكن المشاركة لكل من لا يستخدم العنف. مصر دولة ونظامها الموجود والبشر متسامح جدا. ببساطة خالص هو عايز يعيش، مش عايز يعمل صراع ولا يتقاتل. ففرصة المشاركة موجودة بشرط ما يبقاش فيه عنف واقتتال، والقبول بالممارسة الديمقراطية الحقيقية، تداول السلطة ، الكلام ده كله مش موجود في أدبياتهم هما بيوصلوا للحكم صحيح لكن ما بيخرجوش منه تاني، بالقوة بقى بأي شكل من الأشكال، وده اللي المصريين فهموه، وخافوا منه ورفضوه.
سؤال: يقول البعض داخل وخارج مصر إنك تؤسس لحكم الفرد في وجود شعبية جارفة ويدللون على ذلك بقانون التظاهر والزج بالآلاف في السجون ومراقبة الانترنت وأمور أخرى، فما ردكم؟
احنا حريصين بجد على ان يبقى فيه ممارسة حقيقية للديمقراطية وحقوق الإنسان بس مهم قوي إن احنا نبقى عارفين ان في مصر فيه 90 مليون والظروف الامنية والاقتصادية في مصر صعبة قوي. وافتكر ان المصريين قاموا بثورتين خلال الاربع سنين اللي فاتوا، وده أمر بيبقي تأثير كبير جدا على المزاج العام وعلى الأمن وعلى الموقف الاقتصادي ، تأثير بياخد وقت على ما نتجاوزه يعني لو انت فيه واحد في الألف حيتم احتجازه أو القبض عليه علشان هو خارج السياق، احنا بتكلم على 90 ألف مواطن ، انا عاوز أأكد ان ولا حتى اقل من تلت هذا الرقم ده امر يدلل على ان فيه صبر كبير جدا من جانب اجهزة الأمن علشان نتعامل مع الحالة المصرية، اللي هية حالة الثورة وأعراضها اللي موجودة في مصر، لكن برضه احنا حريصين على ده يتم والدولة ما تتعرضش لأزمات أكثر من اللي هيه متعرضه ليها . حط في الاعتبار الموقف الأمني في سينا، حط في الاعتبار الممارسات الارهابية اللي بتم على امتداد الدولة، وانت هتجد ان المجابهة دي تعتبر مجابهة بتقرأ من جانب البعض بصراحة يعني دون الوضع في الاعتبار الموضوعات اللي انا ذكرتها دلوقتي. قانون التظاهر اللي حضرتك بتتكلم عليه، يا ترى شفتوا النسخة، ولا انا بدافع عنه ولا .. لكن قارنوه بقوانين التظاهر اللي موجودة في الدول الأوروبية وفي أمريكا ده هنا بيتم التظاهر انه بيبقى في اذن وتوقيت وفيه اسلوب ده مبيحصلش في مصر خالص ، قارنوا القانون هتجدوا ان هو لا يقل ابدا بأي حال من الأحوال عن القوانين الأوروبية. واحنا كنا حريصين ان احنا نستدعي تجارب الأخرين في هذا القانون.
سؤال: هل لديكم بشكل شخصي قناعة تامة بالحريات والحقوق الديمقراطية؟ وهل من الممكن الطمع في مزيد من الديمقراطية بينما تقوم الدولة بمكافحة الإرهاب؟
عمري ما هقول ان اللي بيحصل في مصر مثالي، واذا كنا بنتكلم عن قناعات وارادة انا بتمنى طبعا ان يبقى فيه قدر كبير جدا من الحرية والممارسة بس عايزين نعمل ده من غير ما نأذي بلدنا بلدنا في ظروف صعبة جدا، وزي ما انت شايف المنطقة عاملة ازاي فمش عايزين نفصل مصر عن المنطقة ومش عايزين نفصل مصر عن الواقع والظروف الاقتصادية، يعني، ده لازم يتحط جنب بعض كله. حقوق الإنسان اللى حضرتك بتتكلم عليها واللي كثير بيتكلموا عليها مش عايزين نختزلها في حرية التعبير عن الرأي، وإن كنت انا بحترم حرية التعبير عن الرأي، مفيش كلام، واللي متابع الاعلام في مصر هيجد انه بيتكلم زي ما هو عايز أحيانا بيبقى حتى مبالغ في ممارساته لكن لا بأس في كده. فيه في مصر ناس كتير قوي بتعاني، وأنا متصور ان حقوق الانسان متجاوزاها في انه يعيش بشكل كريم ويتعلم بشكل جيد ويجد فرصة عمل حقيقية ده مش موجود وانا بتصور ان احنا محتاجين حقوق الإنسان كفكرة وممارسة محتاجة انها تتطور علشان تعالج المسائل اللي انا بتكلم فيها. فيه ملايين المصريين موجودين بيعيشوا في أماكن لا تليق. فيه كتير من الشباب مبيشتغلش وده مش مقبول، من حقه انه يشتغل انه يعيش انه يبقى عنده بيت وعنده اسرة، ده مش موجود، انا بتصور ان ده من حقوق الإنسان. ومش كده وبس، وعيه، انه يبقى عنده وعي حقيقي بالواقع، ده من حقوق الإنسان.
سؤال: هل تعتقد أن الشباب المصري يدعم حكومتكم؟
انا دايما بقول ان القوى السياسية واحنا كلنا لازم نستوعب شباب مصر لأن الشباب في مصر نسبته كبيرة لكن ماخدش حظه الحقيقي في المشاركة ويمكن انا ناديت من يومين فقط، انه لابد ان احنا نعمل ندوة استراتيجية نناقش فيها ازاي نحقق للشباب المصري انه هو يشارك في العملية السياسية، ويشارك كمان في مستقبل. ما تحقق للشباب غير كافي، واحنا حريصين انه يبقى موجود جنبينا وبعدينا في مصر.
سؤال: هل هناك أمل في المصالحة مع مؤيدي الإخوان المسلمين؟
كنت دايما بقول انه السؤال ده ما يوجهش ليا وإنما يوجه للمصريين، يعني مسألة المصالحة ، انزلوا وقابلوا المصريين البسطاء في مصر واتكلموا معاهم في ده، المفروض فيه إجراءات لمصالحة الشعب المصري، مش مصالحتي أنا، أنا مش زعلان من حد، المصريين هما اللي متألمين جدا من اللي اتعمل فيهم خلال العامين الماضيين.
سؤال: قمتم برفع الدعم جزئيا عن المواد البترولية، فما هي السلع الأخرى التي تعتزمون رفع الدعم عنها؟
الاجابة على السؤال ده الحقيقية لازم احيي فيها المصريين لان الملف بتاع الدعم ده كان ملف شائك جدا مقدرش حد يقترب منه لكن بقول حصل تغير في مصر حقيقي لازم نتوقف قدامه ان وعي المصريين ومسؤولية المصريين تجاه بلدهم اتغيرت بشكل كبير جدا خلال السنتين الماضيين، وعلشان كده كان تجاوب المصريين مع الإجراء ده، وكان اجراء قاس في ظروف اقتصادية لكثير من المصريين في مستوى من الفقر صعب لكن هما تقبلوا، احنا حاولنا ان الاجراء ده ما يمسش الفقراء بشكل كبير لكن هما استقبلوه وتعاملوا معاه بشكل الحقيقة محل تقدير واعجاب. وعلشان كده بقول ان حصل تغير في وعي المصريين تجاه بلدهم تجاه المخاطر، زي ما هما شافوا وخافوا على هوية مصر ان هية تتغير هما استقبلوا الاجراء ان ضروري لاصلاح الموقف الاقتصادي، دي خطوة المفروض ان هي تستمر في خلال خمس سنوات، لأن المفروض ان الدعم اللي فاتورته اكثر من 20 بالمائة من موازنة الدولة بتتأثر بيه. احنا بنبذل جهود كبيرة جدا علشان نخلي مناخ الاستثمار في مصر مناخ جاذب للمستثمرين سواء المصريين أو العرب أو من الدول الأخرى الأجنبية يبقى فيه مناخ جيد للاستثمار في مصر علشان ندي فرص عمل في مصر علشان نزود قدرة الاقتصاد المصري، لان ده امر محتاج ان احنا نتحرك فيه بقوة شديدة جدا. وانت بتسألني بتقولي ايه المخاطر ازاي نجابه المخاطر، لازم نجابه في الاقتصاد بشكل كويس جدا ولازم الدول المتقدمة تقف جنبينا في دعم اقتصادنا علشان نحقق ده.
سؤال: ما هو دور المؤسسة العسكرية في الاقتصاد خاصة وأن بعض رجال الأعمال يجدون في القوات المسلحة منافسة غير عادلة؟
ان يبقى فيه مؤسسة في الدولة يبقي ليها دور أكبر من مؤسسات الدولة ده امر مش مطروح أبدا في تخطيطنا لدعم الاقتصاد، لكن مشروع زي مشروع قناة السويس، وجه مشروع من المشروعات القومية اللي احنا حرصنا ان يتم في مدة زمنية قصيرة جدا على العوائد تكون لصالح الاقتصاد المصري، وعلشان كمان نأهل المنطقة أو مشروعنا الكبير اللي هو تنمية محور قناة السويس. سينا ليها طبيعة خاصة، وتأمين المجري الملاحي على سبيل المثال، ده أمر مكلفة بيه القوات المسلحة مع باقي أجهزة الدولة. التجارة العالمية بتمر من قناة السويس، والقناة الجديدة اللي بنعملها موازية لقناة السويس، وكان لابد أن الجيش يكون هو انه جايب أكثر من 65 شركة من القطاع المدني بس تحت اشراف علشان ضمان ان المشروع لا يشكل اي تهديد أو خطر على المجرى الملاحي لقناة السويس والتجارة العالمية.
سؤال: ما هو الموعد المثالي للانتخابات البرلمانية ؟
أعلنا من يومين ان احنا عايزين طبقا لخارطة الطريق ان خلال .. ان احنا المفروض نكون انجزنا هذه المهمة على نهاية هذا العام، احنا اعلنا كده، كان فيه مطالب بان يتم تأجيل ده، لكن قولنا احنا كنا حريصين ان خارطة الطريق، والاجراء الاول الاستفتاء على الدستور وده تم الانتهاء منه ثم الاجراء التاني وهو الانتخابات الرئاسية وده تم الانتهاء منه والاجراء التالت الانتخابات البرلمانية واحنا حريصين انه يتم في ميعاده خلال هذا العام.
سؤال: هل ستسمح بدخول الإخوان المسلمين الانتخابات من باب خلفي؟
المصريين هما اللي هايختاروا نوابهم، واحنا بنأكد على المصريين ان انتوا اختاروا الاصلح لكم علشان ده هيبقى خطوة في طريق المستقبل، المصريين الشعب المصري هو اللي يجاوب على السؤال ده.
سؤال: ما تقييمكم للأداء الإعلامي الذي يصورك كالرئيس الملهم الذي لا يخطئ ؟
لا أتفق معاك في ان الاعلام، الاعلام ينتقد أي حد هاتوا الصحافة وشوفوا المقالات التي بتتكتب ، لا لا، في مصر ، بلا أي مبالغة بيتعامل في اطار حرية اعلام حقيقية، ومحدش هيقدر يوجهه، ومحدش هيقدر يوجهه، محدش هيقدر يوجه الاعلام المصري، غير الضمير المصري دلوقتي والمسؤولية الوطنية بتقول ان مصر بتواجه مخاطر شديدة والاعلاميين بيتعاملوا في هذا الاطار. لكن ما حدش بيوجه الاعلام وما حدش هيقدر يوجه الاعلام وانا ما أحبش ان الاعلام يوجه بصراحة. والحاجة التانية، واذا كنتم بتشوفوا خريطة القنوات التليفزيونية وما يقدم هتجدوا فيه انتقاد شديد للحكومة، ولي أنا شخصيا، أنا مش متفق معاك في النقطة دي بصراحة.
سؤال: ما هي الأهمية الرمزية لخريطة مصر المعلقة خلفكم؟
الخريطة دي مش حديثة العهد الخريطة دي معمولة تقريبا من أيام السلطان فؤاد اللي كان حاكم مصر لغاية سنة 1922 ودي كانت اتعملت في التوقيت ده، يعني متعملتش حتى في عهد الملك فاروق اللي قامت ثورة ضده في سنة 1952، لا، دي معمولة تقريبا بقالها ميت سنة. الحدود المصرية متغيرتش، والشعب المصري هو شعب نسيجه واحد وحدوده واحده، طيب نغيرها ليه، احنا عمرنا ما فكرنا نغيرها وعمرنا ما طمعنا في أرض حد. واحنا برضة، المصريين، مش هيحبوا حد يطمع في أرضهم، فهي كده مش هتتغير.
سؤال: هل من المحتمل أن تعفو عن صحفيي الجزيرة؟
انا ما بتمناش ده، لكن بتمني ان العالم اللي بينتقدوا ينظروا إلى إرادة المصريين وشعبها. انا كنت مجرد انسان مسؤول وجد ان فيه ارادة شعبية بتطلب التغيير أو يحصل اقتتال شعبي او اقتتال أهلي داخل مصر، والمسؤولية الوطنية والمسؤولية الأخلاقية ماكانتش تسمح لي أبدا ان احنا نسمح ان مصر تتحول لدول انتوا شايفنها دلوقتي عاملة ازاي، ما حدش يقدر يكون بيحب بلده يسكت على كده.
انتقاد، أتمنى أن الناس اللي بتنتقد تنظر بعناية ولا تفصل الواقع في مصرعن الواقع في المنطقة.
أنا قلت في اجابة قبل كده لو كنت المسؤول الموجود في الوقت ده انا ما كنتش حقيقة اسمح للمشكلة ان توصل للحجم اللي احنا فيه، لكن المسألة في يد القضاء وإذا كنا بنتكلم على دولة بتحترم نفسها وعايزة تبقى دولة ذات سيادة واستقلال للقضاء حقيقي زي الدول المتقدمة اللي بتعتبر انتقاد القضاء أمر غير مقبول على الإطلاق، احنا كمان في مصر منقدرش نقبل ان ننتقد او نعلق على أحكام القضاء على الاطلاق.
خليني يعني أقول ان احنا بندفع ثمن لاستقلال القضاء بتاعنا، ثمن احنا بندفعه.
سؤال: ماذا يبقيك متيقظا بالليل؟
بصراحة اللي بيقلقني جدا في مصر المواطن المصري لأن انا لي حلم مع المصريين ان احنا نتغلب على ظروفنا الاقتصادية الصعبة ونحقق الأمان والاستقرار لكل الناس في مصر ونحميهم من الارهاب والتطرف، ويبقى فيه حياة زي ما انتوا بتعيشوا في بلادكم كده ، عايزين نحلم ببلادنا كده. فهو ده اللي عايش بيه .عايز اشوف بلادي بخير وسلام، عايز اشوف بلادي في ازدهار وخير وتقدم، عايز اشوف بلادي في استقرار، مش انا بس انا وكل المصريين، ده اللي احنا، ده مش سؤال شخصي ولا حاجة، انا عايش الموضوع ده على طول، لكن بطمنك ان احنا ان شاء الله هنحققه لأن الشعب المصري ده شعب، يعني هو قبل التاريخ ما يكون فيه تاريخ، كان فيه مصر. شعب عظيم أوي وشعب قادر أوي، وعلشان كده توقفوا أمام مصر كويس.
ليست هناك تعليقات: